ព៌ត័មាន

បរិវត្តកម្មការអប់រំស្ទែម

បរិវត្តកម្មការអប់រំស្ទែម
"បរិវត្តកម្មការអប់រំស្ទែម" ជាមគ្គុទ្ទេសក៍សម្រាប់ការអភិវឌ្ឍវិជ្ជាជីវៈរបស់គ្រូបង្រៀន បង្កើតឡើងដោយក្រសួងអប់រំ យុវជន និងកីឡា ក្រោមគម្រោង STEP UP។
គោលបំណងរួម គឺដើម្បីកសាងធនធានមនុស្សដែលមានជំនាញសតវត្សទី២១ សម្រាប់យុគសម័យឌីជីថល ដោយផ្តោតលើការអប់រំស្ទែមដែលផ្សារភ្ជាប់នឹងជីវិតរស់នៅជាក់ស្តែង និងការបង្កើតថ្មី។
ខ្លឹមសារសំខាន់ៗ ត្រូវបានបែងចែកជា ៣ ម៉ូឌុល៖
ម៉ូឌុលទី១៖ បំណិនអក្ខរកម្មកម្មវិធីសិក្សា

ម៉ូឌុលនេះជួយគ្រូឲ្យយល់ដឹងស៊ីជម្រៅពីក្របខណ្ឌកម្មវិធីសិក្សាជាតិ ចក្ខុវិស័យអប់រំ និងសមត្ថភាពសំខាន់ៗទាំង ៨ សម្រាប់សិស្សកម្ពុជា។ វាក៏ណែនាំពីរបៀបរចនាថ្នាក់រៀនដែលមានលក្ខណៈអន្តរមុខវិជ្ជា។

ម៉ូឌុលទី២៖ ការរចនាកម្មវិធីសិក្សាតាមលំនាំ Backward Design

ណែនាំពីវិធីសាស្ត្ររៀបចំមេរៀនទំនើប ដោយចាប់ផ្តើមពីការកំណត់លទ្ធផលសិក្សាដែលចង់បានជាមុន បន្ទាប់មករៀបចំការវាយតម្លៃ ហើយចុងក្រោយទើបរៀបចំផែនការបង្រៀន។ ម៉ូឌុលនេះលើកទឹកចិត្តឲ្យគ្រូមានស្វ័យភាពក្នុងការរចនាកម្មវិធីសិក្សាដោយផ្អែកលើមនសិការវិជ្ជាជីវៈ និងតម្រូវការរបស់សិស្ស។

ម៉ូឌុលទី៣៖ ការប្រើប្រាស់បច្ចេកវិទ្យាក្នុងការបង្រៀន
ជាមគ្គុទ្ទេសក៍ជាក់ស្តែងក្នុងការប្រើប្រាស់ឧបករណ៍ឌីជីថលសំខាន់ៗដូចជា កម្មវិធី STTC, Google Classroom, Khan Academy, និង STTC H5P Server ដើម្បីបង្កើតវីដេអូ និងសកម្មភាពរៀនសូត្របែបអន្តរកម្ម។